تہران (نیوزڈیسک) ایران میں خواتین پر مشتمل آسمان ایئرلائنز کی پہلی کامیاب پرواز لانچ، ایران کی پہلی خاتون کمرشل پائلٹ شہرزاد شمس نے نئی تاریخ رقم کردی، خاتون پائلٹ اور خواتین عملے پر مشتمل آسمان ایئرلائنز کی پرواز 110 خواتین مسافروں کو لے کر مشہد شہر لینڈ کرگئی۔
ایرانی میڈیا کے مطابق آل ویمن فلائٹ ایران لیڈی (ایران بانو) کی کیپٹن شہرزاد شمس کو ایران کی پہلی خاتون کمرشل پائلٹ ہونے کا اعزاز حاصل ہے۔غیر ملکی میڈیا کے مطابق یہ کارنامہ اس وقت سرانجام دیا گیا جب ایران میں حضرت فاطمۃ الزہرا ؓ کے یوم پیدائش کی مناسبت سے خواتین کا دن منایا جارہا ہے۔
’ایران بانو‘ (ایران لیڈی) کے نام سے موسوم یہ طیارہ ایران کے دوسرے سب سے بڑے شہر مشہد کے ہاشمی نژاد بین الاقوامی ہوائی اڈے پر اترا۔اہلِ تشیع کے نزدیک یہ مقام مقدس ترین مقامات میں سے ایک ہے جہاں امام رضا علیہ السلام کا روضہ مبارک ہے۔
مقامی میڈیا کے مطابق اکتوبر 2019 ء میں، پائلٹ نشاط جہانداری اور شریک پائلٹ فوروز فیروزی اسلامی جمہوریہ کی تاریخ میں مسافر پرواز اڑانے والی پہلی خاتون تھیں۔
