اکثر لوگ افطار کے وقت فروٹ چاٹ نہیں بناتے کہ مہنگائی میں کیا ڈھیروں پھل خریدیں اس کے بجائے صرف خربوزہ لے لیتے ہیں کہ چلو یہ ذائقہ دار بھی ہے اور پانی کی کمی بھی پوری کرتا ہے۔ لیکن جب خربوزہ بھی پھیکا نکل آئے تو پھر کیا کریں؟ آج کے اس آرٹیکل میں آپ کو اسی حوالے سے بتایا جائے گا۔ یہ آرٹیکل خاص طور پر شوگر کے مریضوں کے لئے ہے کیونکہ ہم اس میں بنا چینی استعمال کیے ہی خربوزے کو میٹھا کرنے کے طریقے بتائیں گے۔
دار چینی پاؤڈر
خربوزے کو چھیل کر کاٹ لیں۔ اس میں پسی ہوئی دار چینی چھڑک دیں اور اچھی طرح مکس کریں۔ دار چینی کا ذائقہ ہلکی سی مٹھاس لئے ہوتا ہے جس سے خربوزہ بھی میٹھا ہوجائے گا۔ اس کے علاوہ دار چینی پاؤڈر کے کئی فائدے بھی ہوتے ہیں جیسے نظام ہاضمہ اور قوت مدافعت بڑھانا۔ افطار میں اس کو کھانے سے تیزابیت کا اثر ختم ہوجائے گا۔
کوئی ایک میٹھا پھل
خربوزے کے ساتھ کوئی بھی ایک میٹھا پھل کاٹ کر ڈالیں جس کی مٹھاس سے خربازہ بھی میٹھا ہوجائے گا۔ یہ ٹرک خربوزے میں شکر ڈالنے سے بہتر ہے۔ اگر افطار سے کچھ گھنٹے قبل چیکو یا کیلا کاٹ کر خربوزے میں ملا کر فرج میں رکھ دیں تو خربوزے کا پانی دوسرے پھل کی مٹھاس جذب کر لے گا۔ افطار سے پہلے پھلوں کو پیالے میں اچھی طرح مکس کرلیں اور ٹھنڈے میٹھے پھلوں کا لطف اٹھائیں۔
نمک
پھل کے اوپر ہلکا سا نمک چھڑک دیں۔ یہ پھل کو میٹھا تو نہیں کرے گا لیکن کھاتے ہوئے خربوزے کی مٹھاس کو ابھار دے گا۔ لیکن کوشش کریں کہ نمک ہلکا سا ڈالیں کیونکہ یہ صحت کے لئے اچھا نہیں ہوتا۔
